Poipoia te kākano kia puāwai

Nā Ngarangi-i-tahunamai

I te tīmatanga o te wāhanga kura nei ( wāhanga tuarua ), i whakahou mātou ko Kelly Misi, Teremaanu Hall, Hinemoa Paenga, Te Ua Tumoana, Marilyn-Belle Mahanga-Shepherd ko Devyne Tuiavii i te pouaka māra o te Marae o Hoani Waititi. I kaha tukia te pouaka e ngā waka o ngā manuhiri me te hau kāinga, nā konā i whakaritea e te rōpū Kaiao kia whakahoungia te pouaka.

I te tīmatanga o te tau nei i whakaritea e te rōpū Kaiao kia whakahoungia te pouaka māra o te Marae, ko te mahi tuatahi i mahia ko te whakamahuki, ko te matapaki. I whakaaro mātou mō te take e tukia ana te pouaka e ngā waka, ā, kātahi i taka te kapa. He iti rawa te pouaka, ka kore te kaitaraiwa e kite i a ia e hoki muri ana. Nā runga anō i tērā whakaaro i whakaritea e mātou kia teitei ake te pouaka, otirā kia pīata mai ngā tae.

I tīmata mātou te whakarite i ngā mahi hangahanga. I tīmata ngā mahi ine kia pai te tīmata o ngā mahi whakarite rākau kia hanga mai i te pouaka. I whakaritea kia wehe te rōpū kia ahei ētahi te rangahau i ngā utu, ā, ko tērā atu rōpū i mahi i ngā mahi hangahanga. Ko Teremaanu rāua ko Te Ua tērā i rangahaua ngā utu mō te peita me ngā rākau. Ko te toenga o mātou i tīmata i ngā mahi hangahanga. Ko ngā mahi tuatahi i mahia, ko te whakapākarukaru haere i te pouaka tawhito, ā, ko te waihangamai hoki i te tūāpapa o te pouaka hou. E rima ngā paparanga o te pouaka hou, ā, i mua i te waihanga mai i te pouaka hou, e rua noa iho ngā paparanga o te pouaka.

Kua āhua ono ki te whitu wiki mātou e hanga mai ana i te pouaka hou heoi, ehara i te mea kua oti i a mātou. Kua nui ngā raruraru o te pouaka hou. I te tīmatanga o te hanga i ngā whakapaparanga i āhua tītaha mai te āhua, nā runga anō i tērā i tīmata mātou ki te āta tangotango haere i ngā whakapaparanga, kātahi i whakatikaina e mātou. I paku kotiti te haere i ētahi wā, i te paku āwangawanga au nā te pōturi o tā mātou mahi heoi, i okea tonu te oke, mā pango mā whero ka oti te mahi.

I kaha te rere o ngā whakaaro auaha i a mātou e whakaaro ana mō ngā momo peita hei whakarākei i te pouaka, kātahi i puta mai te whakaaro mō tētahi momo peita ka muramura mai i te pō. Inā te whakaaro auaha ko tērā.

Ehara i te mea kua oti te hanga mai i te pouaka, me whakapiri tonu mātou i ngā paparanga, ā, me peita anō hoki, kātahi ka tutuki .

Haunga anō ngā piki me ngā heke i rawe te wheako i ēnei mahi, he tuatahi ēnei mahi māku, ā, inā te mutunga mai hoki o te pai ki au.